Zazpi herrik osatzen dute (Artaiz, Alzorriz, Cemborain, Najurieta, Untziti, Zabalzeta eta Zorokiain), eta Untziti harana Izaga haitzaren ipar-mendebaldean dago. Ibarreko herriguneen arteko hurbiltasunak batetik bestera paseatzeko aukera ematen du, zerealaren laborantzarako bereziki pribilegiatuak diren lurren artean. Herri batetik bestera, bailarako sare komunitarioa ehuntzen laguntzen duten ekimen kultural eta sozialak ere igarotzen dira.
Untzitibar
Aurkezpen bideoa ikusi
OIHANE MACGUINESS ARMENDARIZ
(Iruña, 1994)
Artista plastiko-bisuala eta irakaslea, bere praktika UPNA-ko irakaskuntzarekin eta bitartekaritza artistikoko hainbat proiekturekin uztartzen duena. Gaur egun ‘Shakaur’ proiektua garatzen ari da Ekoiztu-ren egoitzarekin Uharte Zentroan.
Uholdeak 2023an eta arte gazteari buruzko hainbat topaketetan erakutsi ditu bere lanak. Arte Ederretan Graduatua, eta Bigarren Hezkuntzako Irakasleen Prestakuntzan Masterra (EHU/UPV), Praktika Artistikoetan eta Ikasketa Kulturaletan Masterra (EHU-UPNA) eta Ikerketa eta Sorkuntza Artean Masterra (EHU/UPV).
Ibilitakoa eta airearen kulturaren ertzak kartografiatu.
Proiektu honen xedea da Untzitibarko herrietako biztanleen arteko kohesioa lortzea. Untzitibar zortzi herrik osatzen dute, eta horietako bat hutsik dago. Herrien arteko topaketa egiteko eta trukerako aukerak sortu. Ibiltzea eta ibilaldiak ohiko lotura dira ibarrean. Ibarreko mapa ibilian-ibilian egin da, baina mapa bat osatzea da asmoa, non lurraldeari lotutako esperientziak eta “herri-kulturaren” edo “airearen kulturaren” hainbat alderdi biltzen saiatuko garen, ohikoa ez den kartografia osatze aldera.
Lehenik eta behin, hainbat topaketa antolatuko dira, eta, horietan, auzokideek beren eguneroko elementuak eta memoria partekatuko dituzte; besteak beste, hitzak, esaerak, errezetak, oroitzapenak, esperientzia komunak eta lekuak. Topaketa horiek informazioa jasotzeko eta euskarri komun batean biltzeko balioko dute, ibarraren mapa desberdin bat osatuz; horretan, espazioak adieraziko dira eta orainean aipatzen diren gai horiei lekua emanen zaie. Horretarako, hainbat materialekin lan eginen da, eta esplorazio-fasean gaurgero agertu diren elementuak biltzeko modu desberdinak bilatuko dira: hitza, marrazkia, argazkiak… baita asmatutakoa ere.
Azkenik, esperientzia partekatzeko, topaketa bat eginen da leku komun batean. Topaketa horretan mapak partekatuko dira eta bildutako materiala trukatuko da. Proiektu honen xedea ez da soilik memoria moduko bat eta bailararen bilakaera kolektiboa biltzea eta partekatzea, biztanleek partekatu ahal izateko espazioak sortzea ere bada.
