Aurkezpen bideoa ikusi
OIER ZUÑIGA
Oier Zuñiga Iruñean bizi den aktore eta artista bisuala da. Ilustrazioko plastika-arteetan, performancean eta arte eszenikoetan egin du bere arte-ibilbidea.
Arte-gradua ikasi zuen EHUko Leioako campusean eta Arte Dramatikoko ikasketa profesional egin zituen ENT-NAEn. Praktika artistikoen eta Kultur ikasketetan masterra egin du NUP-Uharteko Arte Garaikideko Zentroan.
Hainbat antzezte-proposamenetan egin du lan, eta ilustrazio aplikatuko proiektuak, arte-proiektu pertsonalak eta arte bisualetako lanak landu ditu. Uztartu egin ditu artearloko jarduera profesionala eta herri-elkarte eta herri-adierazpen kulturaletan parte hartzea.
Arte-bitartekaritzaren arloan ere hainbat lan garatu ditu. Bai, Gayarre Antzokiko bitartekaritza-taldeko kide gisa, bai Nafarroako Gobernuko Hezkuntza Departamentuko proiektuetan.
ESKU-HARTZE ARTISTIKOA: Denbora, testigu.
Zonaldeko despopulazioak, nekazaritza-jarduera jaitsi izanak eta Nafarroako Pirinioen gaur egungo egoera sozioekonomikoak, iragan aberatsa eta aktiboa (istorioak, usadioak eta memoria) zuen errealitatea erakusten digute, baina baita arreta eman, behatu, eraldatu eta birmoldatu beharreko oraina eta etorkizuna ere.
Proposamena Jaurrietaren errealitate posible eta askotarikoak fikzionatzeko prozesu bat izan da. Auzokideen arteko hizketaldien prozesu baten bidez, herritarrek topo egin ahal izateko eta orainari buruzko ikuspegiak eta begiradak trukatzeko espazio bat eskaintzeko. Helburu nagusia izanik Jaurrietan etorkizun posibleak pentsatzea, irudikatzea, desiratzea edo fikzionatzea.
Talde txikietan egindako topaketak izan ziren, dinamika baten bidez emanak. Dinamika horren barnean, parte-hartzaileek azken helburua zein zen jakin gabe, herriaren etorkizun posibleak pentsatu, desiratu eta irudikatu behar izan zituzten. Jaurrietaren aukerak alegi edo fikzio bidez dibertsifikatzeko asmo argiarekin. Hori guztia audioan grabatu zen, erregistro bat izateko eta, gerora, lortutako materiala partekatu ahal izateko.
Material hori zabaltzeko eta etorkizunari buruzko hausnarketa fikzionatua amaitzeko, mekanismo irekia, publikoa eta sarbide askekoa ezarri zen herrian, ibilbide gisa. QR kodeak dituzten plaka batzuen bidez, errealitate berriak osatzen dituzten fikzio horietara sar daiteke. Horrela, tokiko geografian bertan in situ bistaratzen ari den lurraldeari buruzko hausnarketa bultzatuko duten entzumenezko fikzioak sortuz.
